16.05.2024 ж. күні «Қарағанды облысында білім беруді дамыту оқу-әдістемелік орталығы» КМҚК басшылығымен Қарағанды жоғары гуманитарлық колледжінде республикалық «Менің бауырым» және «Мұғалім болу – мақтаныш!» педагогикалық сынып бейіндік жобалары аясында қазақ әдебиетінің үш бәйтерегі – С.Сейфуллин, І.Жансүгіров, Б.Майлиннің туғанына 130 жыл толуына орай мектеп оқушылары арасында «Өнегелі өмір» тақырыбындағы ғылыми-практикалық конференция өтті.
Конференцияның мақсаты: қазақ әдебиеті тарихында өздерінің қолтаңбасын қалдырып, өр тұлғасын танытқан үш бәйтерек – үш ғұмыр – С.Сейфуллин, І.Жансүгіров, Б.Майлиннің биік өресін, шығармашылық қырын, өнерпаздық келбетін, парасаттылық болмыс-бітімін, ұлттық құндылықтарға қатысты көзқарастарын таным таразысына салып зерделеу, зерттеу. Білім алушылардың ұлттық және жалпыадамзаттық құндылықтарға бағдарлануын қалыптастыру.
Конференцияға Қарағанды қаласы А.Байтұрсынұлы атындағы мектеп-гимназия, С.Сейфуллин атындағы гимназия, №3 гимназия және Бұқар жырау ауданы, Нұра ауданы, Осакаров ауданы мектептері оқушылары, колледж студенттері қатысты.
Пленарлық отырысты Қарағанды облысында білім беруді дамытудың оқу-әдістемелік орталығы директоры Б.Х. Абдикерова ашып, «Ұлт руханиятының үш бәйтерегі» тақырыбында баяндама жасады. Қарағанды гуманитарлық колледжі директорының ғылыми жұмыс жөніндегі орынбасары Д.К.Исатаев, ҚО ББД ОӘО ТжКББ бөлімінің әдіскері А.А.Кнашина, академик Е.А.Бөкетов атындағы Қарағанды университетінің профессоры, филология ғылымдарының докторы Ж.Қ.Смағұлов, А.Байтұрсынұлы атындағы мектеп-гимназияның қазақ тілі және әдебиеті пәні мұғалімі А.Қ.Акаева және осы мектептің оқушысы А.Ахынбек, колледж студенті Т.Б.Амантаева сөз алды.
Конференция жұмысы үш бағыт бойынша жүрді:
1-бағыт «Өлең сөздің гауһар тастай дарасы» (С.Сейфуллиннің ақындық, жазушылық қыры, зерттеушілік ізденісі, азаматтық, қайраткерлік бейнесі, өнерпаздық тұлғасы, поэзиядағы жаңашылдығы туралы);
2-бағыт «Қазақты сұлу жырға қанық еттің» (І.Жансүгіровтің үлкен парасат иесі екендігі, қоғамдық-әдеби қызметі, шығармаларының идеялық-көркемдік сипаты, өмір шындығы туралы);
3-бағыт «Бір ғажап сиқыр күш бар тіліңде ойнар» (Б.Майлиннің қаламгерлік, суреткерлік, шеберлік қарымы, дала жырларының өзіндік ерекшеліктері, драмалық шығармалары жөнінде).
Конференцияға қатысқан оқушылар мен мұғалімдерге электронды материалдар жинағы және сертификаттар берілді.
