18.11-06.12.2024 ж. күндері аралығында Қарағанды жоғары гуманитарлық колледжі «Бастауыш білім» бөлімінің 2 курс студенттері мен қала мектеп оқушыларының қатысуымен «Педагогикалық сынып» жобасы аясында «Мұғалім болу – мақтаныш!» тақырыбында «Болашаққа қадам: ХХІ ғасыр педагогы» кәсіби бағдар сағаттары өтті. Жобаға қаланың келесі оқу мекемелері қатысты: «Абай атындағы мектеп-гимназиясы», «Б.Момышұлы атындағы мектебі», «С.Сейфуллин атындағы гимназия», «Шәкәрім Құдайбердіұлы атындағы мектеп-гимназия», «Академик Е.А.Бөкетов атындағы жалпы білім беретін мектебі», «Г.Потанин атындағы орта мектебі».
Іс-шараның негізгі мақсаты – болашақ педагогтарға ХХІ ғасырдың талаптарына сай кәсіби дағдылар мен қасиеттерді қалыптастыруға бағытталған ақпарат беру және оларды ұстаздық жолға ынталандыру.
Кездесу барысында педагогикалық мамандықтың өзектілігі, білім беру саласындағы заманауи трендтер және мұғалімдердің қоғамдағы рөлі талқыланды. 45 жылдан астам тарихы бар «Қарағанды жоғары гуманитарлық колледжі» тарихы қысқаша баяндалды. Оның артықшылықтары атап өтілді: 9-11 сыныптар негізінде оқыту, сұранысқа ие мамандықтар, дәстүрді заманауи тәсілдермен үйлестіру. Қатысушылар практикалық тапсырмалар орындап, болашақ мамандықтарына қатысты сұрақтарға жауап алды. Шараға мектептің оқушылары мен мұғалімдері белсенді атсалысты.
