19.12.2025 ж. күні Қарағанды жоғары гуманитарлық колледжінде «Адал азамат» біртұтас тәрбие бағдарламасы аясында «Адал азамат – елдің шамшырағы» тақырыбында тағылымды кездесу кеші өтті.
Іс-шараға Қазақстан Республикасы Парламенті Мәжілісінің депутаты, Қазақстан Республикасы Президентінің жанындағы әлеуметтік осал топтардың құқықтары жөніндегі уәкілі Сейтжан Кенжеғұл Социалұлы қатысып, студент жастармен мазмұнды әрі еркін форматта кездесу өткізді.
Кездесудің басты мақсаты – студент жастардың бойына адалдық, әділдік, жауапкершілік, мейірімділік сынды жалпыадамзаттық құндылықтарды сіңіру, сондай-ақ ерекше білім беруді қажет ететін студенттердің өмірге деген жігерін үлгі ету.
Іс-шара аясында колледж директоры Гүлмира Сұлтанмұратовна Сейтжан Кенжеғұл Социалұлымен бірлесе отырып, ерекше білім беруді қажет ететін студенттердің оқу бағдарламасын толық әрі сапалы меңгеруіне тең жағдай жасау мақсатында «Ерекше білім беруді қажет ететін студенттерді қолдау кабинетін» ашты.
Кабинет заманауи арнайы құрал-жабдықтармен қамтылды:
портативті Брайль дисплейі
ZoomText Fusion бағдарламасы орнатылған компьютер
ViewPlus Embraille Брайль принтері
Колледж мақтаныштары – көру қабілеті бұзылғанымен, спортта жоғары жетістіктерге жеткен студенттер:
Дүйсенбаев Нұрдәулет
Бейсекеева Ділназ
Гайнуллов Марсель
Аталған спортшылар 2025 жылдың желтоқсан айында Дубай қаласында өткен V Азия жасөспірімдер пара ойындарында алтын медаль иеленіп, ел мерейін асқақтатты.
Кештің құрметті қонағы – Қарағанды жоғары гуманитарлық колледжінің түлегі, жүзуден төрт дүркін Паралимпиада чемпионы Анатолий Федоровский, жастармен өзінің өмір жолы мен жетістікке жету тәжірибесімен бөлісті. Кездесу барысында студенттер қонақтармен еркін сұхбаттасып, көкейдегі сұрақтарына мазмұнды жауаптар алды. Тағылымды әрі тәрбиелік мәні зор кездесу кеші мерекелік концертпен қорытындыланды.