28.11.2023 ж. күні Қарағанды жоғары гуманитарлық колледжінде «Алаш айлығы» шарасы аясында Сұлтанмахмұт Торайғыровтың туғанына 130 жыл толуына орай «Алаш туы астында» атты әдеби панорама ұйымдастырылды.
Шараның мақсаты: Әдебиетіміздің аса дарынды өкілдерінің бірі, сан қырлы талант иесі С.Торайғыровтың ақындық, жазушылық, ағартушылық қырларын ашу, өскелең ұрпаққа таныстыру және үлгі ету, Алаш азаматының рухына бас ию.
Небәрі 27 жыл ғана өмір сүріп, Алаштың көгінде жұлдыздай жарқ етіп, аз ғана ғұмырын халқының өркендеуі мен азаттығына, ағарту ісі мен әдебиетіне арнап, Алаш туы астында, Күн сөнгенше сөнбейміз! – деп жырлаған халқымыздың бірегей тұлғаларының бірі С. Торайғыровтың өмірі мен шығармашылығын колледж студенттері жан-жақты аша білді: өлеңдерін жатқа оқыды, өлеңдері мен поэмалары, романдарының тақырыптық ерекшелігі туралы шағын ғылыми жобалар қорғады, студенттер мен қала тұрғындары арасында сауалнама жүргізді, сондай-ақ, қазіргі кезде ақын есімінің насихатталуы мен зерттелуі туралы хабарлама жасады.
Әділдік – бұл «бақыт пен күштің кілті» – дейді ақын. Олай болса, Әділетті Қазақстанда, еліміздің өркендеуі мен жасампаздығы жолында білім алып, қажырлы еңбек ету – біздің, яғни жастардың, басты міндеті. Берері көп, танымы мол шара жалғасын табады деген сенімдеміз.
