ӨНЕР МЕН БІЛІМНІҢ БИІК ТҰЛҒАЛАРЫ: РУХАНИ КЕШ!
17.10.2025ж. күні Қарағанды қаласындағы Кеншілер мәдениет сарайының ұйымдастыруымен ұмытылмас әдеби-сазды кеш өтті. Еліміздің мәдениеті мен білім саласына өлшеусіз үлес қосқан, Қазақстанның еңбек сіңірген қайраткерлерінің өнегелі дара жолына арналған бұл кеш өнерсүйер қауымға ерекше рухани қуат сыйлады.
Кештің басты кейіпкерлері – екі қадірлі тұлға:
1. Әміров Есжан Сарманқұлұлы – 20 жылдан астам Қарағанды жоғары гуманитарлық колледжін басқарған білім саласының ардагері, белгілі сазгер.
2. Кемалов Жақсыгелді – Қ. Байжанов атындағы Қарағанды концерттік бірлестігінің дәстүрлі әншісі, Тәттімбет атындағы Қарағанды өнер колледжінің ардақты ұстазы.
Сахна төрінде кеш қонақтары өздерінің шығармашылық өмірлері мен ұстаздық қызметтерінің қыр-сырын ақтарып, терең ойлар мен қызықты естеліктермен бөлісті. Әрбір өнегелі сұхбаттан мол тәжірибе, сарқылмас жігер және туған өнерге, білім саласына деген шексіз махаббат лебі сезіліп тұрды.
Кештің басты сәні – ән мен саздың құдіреті болды! Бұл кеште сазгер Есжан Әміровтің тыңдарман жүрегінен орын алған әуезді әндері орындалды. Сазгер Есжан Сарманқұлұлының өзі баян мен гитараны сөйлетіп, бірнеше әнін шырқағанда, көрермендер қошеметі ерекше болды!
Дәстүрлі ән өнерінің хас шебері Жақсыгелді Кемалов және оның талантты шәкірттері қазақтың дәстүрлі әсем әндерін шырқап, кештің көркін қыздыра түсті. Ұстаз бен шәкірттің өнердегі сабақтастығы көрермендерге ерекше рухани ләззат сыйлады!
Бұл мерекелік кешке Қарағанды жоғары гуманитарлық колледжінің студенттері мен оқытушылары да қатысып, ұлағатты ұстаздар мен өнер иелерінің шығармашылығынан үлгі-өнеге алып, ерекше әсермен қайтты.
Кеш ұйымдастырушыларына үлкен алғыс білдіреміз!